Dispensasjon frå arealplan eller plan- og bygningslova

Det kan gjevast dispensasjon frå reglar fastsett i eller i medhald av plan- og bygningslova. 
Dette gjeld t.d.: 

• Tilhøve i arealplan som t.d formål, utnyttingsgrad, byggjegrenser, utforming av bygg
• Byggjeforbodet i strandsona
• Kravet om avstand til nabogrense, og andre krav i plan- og bygningslova med forskrifter.

Det kan ikkje gjevast dispensasjon frå sakshandsamingsreglene i plan- og bygningslova eller byggesaksforskrifta (SAK10). Det er også nokon krav i lova (pbl.) og i byggteknisk forskrift (TEK17) som heller ikkje er særleg aktuelt å dispensere frå, t.d krav til estetisk kvalitet i det som vert bygt, eller frå tryggleikskrava i byggteknisk forskrift (TEK17).
 

Kommunen kan berre gje dispensasjon viss:

• omsyna bak regelen i planen det vert dispensert frå eller føremålet til plan- og bygningslova (plb. §1) ikkje blir vesentleg tilsidesett.
• I tillegg må fordelane ved å gje dispensasjon vere klart større enn ulempene.

Det er fordelar og ulemper for dei allmenne interessene som skal vurderast opp mot kvarandre. Relevante fordelar kan t.d vere planfaglege eller arealdisponeringsmessige. Økonomiske og privatrettslege tilhøve skal i utgangspunktet ikkje vurderast.

Sjølv om desse to vilkåra er oppfylte er det ikkje sjølvsagt at du får dispensasjon. Kommunen må også vurdere konsekvensane ein dispensasjon vil få for helse, miljø, tryggleik, tilgjenge og jordvernet.

Det er viktig å merke seg at det er tiltakshavar/søkjar som skal grunngje og legge fram grunnlaget for å gje dispensasjon. 
 

Når du skal søkje om dispensasjon bør du grunngje den med forhold som er spesielle for saka di. Generelle argument som mange andre også kan komme med, vil normalt ikkje kunne tilleggast særleg vekt. Det kan likevel vere viktig at du gjer greie for desse også. Har du argument som tel positivt for omsynet bak regelen du søkjer om dispensasjon frå, vil det vere til din fordel. Argument som er knytta til meir personlege forhold, slik som for eksempel behov for større plass, personlege forhold som sjukdom eller liknande, eller at dispensasjonen er nødvendig som ledd i eit arveoppgjer har kan ikkje tilleggjast avgjerande vekt i dispensasjonsvurderinga. 

Dette skuldast at arealbruk vert fastlagt i eit livslangt perspektiv, mens eigarforholda på staden vil kunne vere skiftande. Individuelle omsyn som sosialmedisinske, personlege eller sterke menneskelege omsyn kan nokon gongar «tippe vektskåla» for dispensasjon der det ikkje er andre forhold som talar tyngre mot en dispensasjon. Personlege ynskjer om ein bestemt bruk av ein eigedom kan i nokon tilfelle vere samanfallande med dei omsyna plan- og bygningslovgjevnaden skal ivareta. Eksempel på dette er der dispensasjonen fører til at bygget eller uteopphaldsarealet får betre funksjonalitet, eller der dispensasjonen vil gi betre. 
 

Du må skrive eigen søknad om dispensasjon. Du kan velje om du vil søkje dispensasjon først, og seinare søkje om sjølve tiltaket, eller å søkje dispensasjon samtidig som du søkjer om sjølve tiltaket.

Dispensasjonssøknaden skal innehalde:

1. Ei kort skildring av tiltaket og kva det vert søkt dispensasjon i frå. Illustrer gjerne med bilete eller teikningar.
2. Ei utgreiing av kva fordelar og ulemper som talar for/mot dispensasjon.
3. Situasjonskart/Kartutsnitt som viser plassering av tiltaket. Dette må vere målsett.
4. For bygg må du leggje ved plan, snitt – og fasadeteikningar med terrengliner, i målestokk 1:100. Teikningane må vere målsette.
5. For terrenginngrep som vegar, murar etc. må du leggje ved terrengsnitt som viser eksisterande og nytt terreng. Terrengsnitta må vere målsette.
6. Dispensasjonssøknader skal nabovarslast, og grunngjeving for søknad om dispensasjon skal leggjast ved varselet. Gjenpart av nabovarselet og kvittering for nabovarsel skal leggjast ved søknaden.

Grunngjeven søknad skal sendast til post@bremanger.kommune.no, eventuelt saman med søknad om løyve til tiltak, eller du kan også sende det i posten til: Bremanger kommune, Postboks 104, 6721 SVELGEN. Dersom du søkjer om løyve til tiltak digitalt kan du også legge inn dispensasjonssøknaden der. 

Skjema for søknad om dispensasjon (DOC, 42 kB)
 

Du må betale gebyr for handsaming av dispensasjonssøknad. Storleiken på gebyret går fram av gebyrregulativet og er avhengig av kor komplisert saka er. For saker som statleg og regional mynde eller andre offentlege instansar har interesse i, og/eller saker som må opp til politisk handsaming, vil gebyret vere høgare enn for enklare saker. Gebyret må betalast uansett utfallet av saka. Det vil seie at du må betale gebyret sjølv om du skulle få avslag på dispensasjonssøknaden.