Det seier Randi Ytrehus som er kommunalsjef for helse og omsorg.
-Vi har lukkast med å tilsette fleire sjukepleiarar og helsefagarbeidarar i faste stillingar. I tillegg bygger vi opp ein bemanningsbase - førebels i ytre, fortel Ytrehus.
Har rekruttert fleire
Bremanger kommune rekrutterer sjukepleiarar og helsefagarbeidarar, også frå vikarbyrå. Ytrehus fortel at vikarane trivst på arbeidsplassane, og at nokre av dei har fått fast tilsetting i kommunen.
-Vi har rekruttert fleire, og har framleis nokre ledige stillingar. Vi tilbyr 100 prosent stillingsheimel, fortel ho.
Ytrehus seier at arbeidet med ulike arbeidstidsordningar er pågåande, og at langvaktene er populære for tilsette både i og utanfor bemanningsbasen.
-Vi arbeider tett saman med dei tillitsvalte. Det gjeld både arbeidstidsordningar og anna, seier ho.
Vil ha faste tilsette
Personell Bremanger kommune tilset i basen ønskjer gjerne langvakter for å opparbeide friperiodar. Ettersom dei fleste ikkje er busette i kommunen vil dei heller legge seg opp lengre periodar heime der dei bur.
Samtidig understrekar Ytrehus at kommunen ønskjer faste tilsette, og at det er fleire grunnar til det:
- Fast tilsette bidreg til å styrke kontinuitet og stabilitet i pasientbehandlinga.
- Fast tilsette bidreg til eit meir stabilt team og sterkare kollegiale relasjonar.
- Faste tilsette investerer ofte meir i arbeidsplassen og måla til organisasjonen. Dei deltek også gjerne i fagleg utvikling, kvalitetsarbeid og forbetringsprosessar.
- Vikarar frå byrå er her kortare tid. De betyr at vi brukar meir tid på opplæring.
- Fast tilsette er lettare å inkludere i intern opplæring, prosedyrar og fagutvikling.
- Fast tilsette gir betre kvalitet.
- Med fast stab er det lettare å planlegge turnus, ferieavvikling og ressursbruk.
- Bruk av vikarbyrå er ofte dyrare på sikt fordi dei har høgare timesatsar og gebyr.
Ytrehus avsluttar med å seie at Bremanger kommune er på rett veg:
-Likevel må vi vere ærlege, og seie at mangel på arbeidskraft framleis er ei utfordring for oss.
