Kva er ein reguleringsplan

Ein reguleringsplan er ein plan for korleis arealet i eit området skal kunne brukast. Kvar kan vi byggje? Kvar kan vi drive næringsverksemd? Kvar skal vi ha parkar, leikeområde og friluftsområde? Kvar skal vegane gå? Reguleringsplanen har føresegner, som set krav til t.d korleis bygg kan sjå ut, kor stort du kan byggje etc.

Det finnast to typar reguleringsplanar. Områderegulering er mindre detaljert og styrer utviklinga i eit større område. Områdereguleringsplan er det som regel kommunen som utarbeider. Detaljregulering er oftast knytt til eit spesifikt byggetiltak, bustadfelt, næringsområde, hytteområde etc.

Utarbeiding av reguleringsplan

Både kommunen, privatpersonar, utbyggjarar, organisasjonar og andre mynde kan komme med forslag til detaljreguleringsplan. Plan- og bygningslova krev at alle reguleringsplanar skal utarbeidast av fagkunnige. Dersom planane du har for området er i samsvar med overordna arealplan (kommuneplanen sin arealdel eller kommunedelplan), er det som regel enkelt å få lov til å regulere området. Dersom planane er i strid med overordna plan, må spørsmålet om du får lov å regulere området leggjast fram for formannskap/kommunestyre.

Når kan du påverke reguleringsplanen?

Ein viktig del av arbeidet med reguleringsplan er å få innspel og synspunkt frå dei som har interesser i området som skal regulerast. Du har høve å komme med innspel og merknader til planarbeidet i to rundar, både ved oppstart av planarbeidet og når framlegget til plan er klart. For kompliserte planar kan det vere rundar med offentleg høyring. Arbeid med reguleringsplan kan ta tid og varierer frå eit halvår til fleire år, avhengig av kompleksitet og konfliktnivå.

Varsel om oppstart av reguleringsplanarbeid

Når eit planarbeid vert starta opp, skal det varslast, både i avis og på heimesida til kommunen, og dei som har spesielle interesser i området (grunneigarar, naboar, organisasjonar) skal varslast med eige brev. Du får då ein frist for å sende innspel til planarbeidet. Innspela som kjem inn blir vurderte vidare i planarbeidet. Frist for å komme med innspel er vanlegvis tre veker etter varsling. I denne fasen sender du innspela direkte til fagkunnig/plankonsulent.

Offentleg ettersyn av reguleringsplanframlegg

Når planframlegget er ferdig, vert det lagt fram for formannskapet, som avgjer om planforslaget skal sendast ut på høyring (offentleg ettersyn). Høyring av planen skal varslast på same måte som planoppstarten, med informasjon i avis og på heimeside, og med brev til dei som har spesielle interesser i planen. Planframlegget kan du sjå digitalt på kommunen sine heimesider, eller i det digitale planregisteret. Planframlegget skal omfatte plankart, føresegner, planomtale og andre utgreiingar. Alle har høve til å kome med merknader til planforslaget. Frist for å kome med uttale i høyringsrunden er minst seks veker. Uttalar og merknader skal sendast til Bremanger kommune.

Etter høyringsrunden vert merknadane handsama, og dersom det vert gjort store endringar i planen vil det bli ei ny høyring.

Vedtak av reguleringsplan

Når merknader til planen er ferdig handsama, vert planframlegget lagt fram for formannskap og kommunestyre til vedtak. Dersom Statsforvaltar, fylkeskommunen, NVE eller andre offentlege mynde har motsegn til planen (protesterer på planen), må desse motsegnene vere avklara før planen kan vedtakast av kommunen. Vedteken plan blir kunngjort i avis og på heimesida, og med varsel til dei som har spesielle interesser i planarbeidet. Dersom du er part i saka eller har spesielle interesser i saka kan du klage på vedtaket innan tre veker frå dette er kunngjort. Dersom kommunen ikkje tek klagen til fylgje, går klagesaka til Statsforvaltaren til avgjerd.

Viss ikkje det kjem klage på reguleringsplanen er den gjeldande frå det tidspunktet den er kunngjort.

Informasjon om klagerett i plansak

Ein kan klage på det endelege kommunestyrevedtaket i reguleringssaker, jamfør plan- og bygningslova § 1-9 og forvaltningslova kap. VI (§ 28–36).

Klagen skal sendast til Bremanger kommune og skal vere signert. Klagen skal innehalde

vedtaket ein klagar på
grunngivinga for klagen
endringa/endringane ein ønskjer
andre opplysningar som kan vere viktige

Klagen skal leggjast fram for behandling i formannskapet. Dersom klagen ikkje blir teken til følgje, blir saka send vidare til Statsforvaltaren til avgjerd. Statsforvaltaren har delegert myndigheit frå Kommunal- og distriktsdepartementet.

Frist

Fristen for å klage på vedtaket er etter forvaltingslova § 29 tre veker frå den dagen vedtaket er komme fram til den gjeldande parten. Dersom klagen blir send inn for seint, kan han bli avvist. Dersom du har særleg grunn til det, kan du søkje om å få utvida klagefristen.

Saksdokument og rettleiing

Du har rett til å sjå saksdokumenta (med visse avgrensingar). Du må i så tilfelle kontakte Bremanger kommune v/plan- og forvaltning, der du òg kan få meir rettleiing om framgangsmåten, sakshandsamingsreglar og andre reglar som konkret påverkar rettane og pliktene dine.

Kostnader ved klagesaka

Etter § 36 i forvaltingslova kan ein part (klagaren) få dekt vesentlege kostnader, til dømes til advokathjelp, når desse har vore nødvendige for å få endra vedtaket til sin fordel. Klageinstansen vil i slike tilfelle gjere deg merksam på retten til dekning.

Rettsverknad av reguleringsplan

Verknad: plan- og bygningslova § 12-4

Ein vedteken reguleringsplan er straks bindande for den framtidige arealbruken i området. Verknadene i planen trer i kraft sjølv om det ligg føre ein klage, med mindre det blir vedteke å utsetje iverksetjinga, jf. forvaltingslova § 42.

Utsett iverksetjing av vedtak: forvaltingslova § 42

Kommunen, ein klageinstans eller eit anna overordna organ kan avgjere å utsetje iverksetjinga til klagefristen er ute eller klagen er avgjord. Ei oppmoding om å utsetje iverksetjinga skal avgjerast så snart som mogleg. Dersom ei slik avgjerd er teken, får reguleringsplanen først rettsverknad når klagefristen er ute eller klagen er avgjord.

Avslag på oppmoding skal grunngjevast, og grunngivinga skal bli gitt samtidig med avslaget. Det er ikkje høve til å klage på ei avgjerd som gjeld utsett iverksetjing.

Grunngjevinga for å ha ein regel om utsett iverksetjing er rettstryggleiken. For klagaren kan det vere avgjerande at vedtaket ikkje blir gjennomført før det er avgjort om klagen fører fram. Dersom tiltak i medhald av reguleringsplan vert gjennomført, kan det vere vanskeleg og kostbart å reversere tiltaka dersom klagaren får medhald.

Erstatning: plan- og bygningslova § 15-3

Dersom ein reguleringsplan fører til endringar av ei tomt som nemnt under § 15-3 første ledd, kan ein setje fram erstatningskrav.

Eit erstatningskrav må etter § 15-3 andre ledd vere sett fram seinast tre år etter at reguleringsplanen er kunngjord etter § 12-12 fjerde og femte ledd, eller etter at vedtak er gjort kjend etter § 12-12 femte ledd.

Innløysing: plan- og bygningslova § 15-2

Grunneigaren (eller festaren) kan krevje at ubygd eigedom straks blir innløyst heilt og fullt når han er regulert til bestemte formål, og dersom han ikkje kan nyttast på ein rekningssvarande måte. Det gjeld når eigedommen er regulert til offentlege trafikkområde, offentlege friområde, fellesområde, fornyingsområde og til statlege, fylkeskommunale og kommunale bygningar og grav- og urnelundar.

Etter § 15-2 andre ledd må grunneigaren krevje innløysing seinast tre år etter at reguleringsplanen er kunngjord etter § 12-12 fjerde og femte ledd, eller etter at vedtaket er gjort kjent etter § 12-12 femte ledd.

Gebyr for handsaming av reguleringsplan

Du må betale gebyr for handsaming av reguleringsplanen. Gebyret er avhengig av kor omfattande arbeidet med planen er.

Bremanger kommune har vedteke eiga forskrift om gebyr for handsaming av private reguleringsplanar, byggjesak, oppmåling og eigarseksjonering (PDF, 307 kB).

Storleiken på dei ulike gebyra vert fastsett av kommunestyret årleg i samband med budsjetthandsaminga.

Lover og reglar

Publisert 03.05.2024 13.20

Sist endra 21.03.2025 10.57